BORONGAN CITY – Nagdudumara hin Birth Registration Assistance Project an PSA-Eastern Samar kabulig an mga Local Civil Registry Office ha kada lokal nga pangobyernuhan kun diin pwede mai-rehistro an mga indibidwal nga waray pa certificate of live birth.
Sumala kan Philippine Statistics Authority Eastern Samar Registration Officer I, Leonardo Rañola, sakop hiton Birth Registration Assistance Project o BRAP an pan-rehistro han mga importante nga panhitabo sugad han kapanganakan (birth), pag-aasawa (marriage), ngan kamatayon (death certificate).
An paagi han pagpa-lista han BRAP in kinahanglan nga kumadto ha kada tagsa nga barangay hall an mga ine agud mahilista.
Kahuman hine in igpapasa naman an nasabi nga lista ha Local Civil Registry Office han kada-tagsa nga bungto.
An mga nailista nga mga indibidwal in beberipikahon ha database han PSA agud makit-an kun waray pa gudman rehistro an mga ine.
An mga beripikado ngan aprubado naman nga indibidwal in papahibaruon han mga rekisitos nga kinahanglan dad-on agud mai-rehistro hira ha ilarom ha ‘late registration’.
Samtang, nanawagan naman ha mga magpapa-rehistro nga andamon an masunod nga mga dokumento: Barangay Certification, Certificate of Indigency, Calid ID, ngan Negative Certification tikang ha PSA. (Bombo Shiela Encio)
