TACLOBAN CITY – Nagpahimatngon hi Philippine Statistics Authority (PSA) Assistant Secretary Daniel Ariaso ha publiko ala kontra ha pira nga mga indibidwal nga gingagamit daw an iya ngaran para makapag-solicit hin kwarta.
Sumala kan Assistant Sec. Ariaso, may mga nakakarawat hira nga report nga daw in mayda mga nagtetext ngan natawag nga ginsusubad an iya boses para umaro hin kwarta, load ngan mayda gihapon daw nagpabook hin hotel ngan nagpacatering service ha Bacolod.
Kasumpay hini in nagpahimatngon ini ha publiko nga diri magpauwat ngan dayon nga isumat ha ira buhatan kun mayda mga indibidwal nga magproprobar nga manguwat ha ira.
Ha pagkayana in kapot na nira an pira nga mga cellphone numbers nga gingamit han mga suspek pero diri pa nira matudlok an mga ini.
Iginpahayag gihapon ni Ariaso nga diri ini an syahan nga beses nga nahitabo ini mahitungod nga mayda na gihapon pira nga mga opisyal han PSA an nabiktima hini.
Gintutuuhan nira nga posible nga mayda usa kagrupo o sindikato nga nagpapaluyo ha mao nga panguwat.
