TACLOBAN CITY – Padayon an panawagan han Philippine Statistics Authority o kun PSA Regional Office 8 ngadto han publiko labi na hadtun waray pa magparehistro, nga magparehistro na hin Philipine National ID system.
An nasabi nga national ID System in kilala kumo Philippine Identification Card nga target makaghatag hin identification ha kada-tagsa gamit an uusa nala nga ID.
Sumala kan Director Wilma Perante han Philippine Statistics Authority (PSA) Regional Office 8, mayda nira mga ginbubuhat nga mga mobile registration ha magkadurudilain nga mga lugar dinhi ha Sinirangan Bisayas sanglit pwede nga maki-partisipar an publiko agud nga makapag rehistro han National ID.
Dugang pa hine nga papanginanuon han PSA Region 8, an report may paghisumpay han mga nakatambak daw nga mga ID Cards nga aadto ha mga PhilPost office.
Subay ha datos han PSA, dida han bulan han August 2022 in aada na ha 934,627 an naideliver ha bug-os nga Sinirangan Bisayas ngan aada naman ha 5,334 ka mga IDs, an nagpapadayon nga igpapandeliver ha Probinsya han Leyte.
Dugang pa ni Perante nga nalalangan daw an pagdeliver han mga IDs mahitungod han mga proseso nga ginsusunod ha Central office sugad nala han verification han biometrics ngan demographics han kada tagsa.
Igin anunsyo gihapon han ahensya nga pwede gihapon maaccess han publiko an ira mga e-phil ID labi na adtun mga nagparehistro pero hasta yana in waray pa ini nira nakarawat.
