NATIONAL–Ginpahayag han International Criminal Court (ICC) han Sabado an proseso ha 4 ka adlaw nga confirmation of charges hearing kanit han kaso nga crimes against humanty kontra kan anay Pangulong Rodrigo Duterte ha iya kontrobersyal nga kampanya kontra droga.
Sumala kan ICC Spokesperson Oriane Maillet, magtitikang an hearing yana nga ika 23 han Pebrero kun diin ginklaro niya nga dire ine trial, kundi pre-trial hearing la.
Ha yugto nga ine, dire pa magdedesisyon an mga hukom ha pagigin inosente o guilty ni Duterte. Ha kaluyo, igpapan-usisa pa la han mga pre-trial judges kun ensakto an ebidensya agud nga dad-on ha trial an kaso han anay Pangulo.
Syahan nga ginpahayag han ICC nga dire gintutugutan an trial ha kawaray han akusado kun igkumpirma an mga kaso.
Samtang, gintugutan han Pre-Trial Chamber I an hangyo ni Duterte nga igpadelatar nga umatender ha confirmation of charges hearing kadungan han iya kakusgan.
Sumala kan Maillet, ha 4 ka adlaw han hearing, mababati-an han Pre-Trial Chamber I an argumento han prosecution, defense, ngan mga legal representatives han mga biktima.
Kahuman hine, magkakamayada daw hin 60 ka adlaw an mga hukom agud nga ig-usisa an ebidensya ngan magbuhat hin desisyon kun ma-abanse ha trial an kaso.
