TACLOBAN CITY – Nanawagan an pira nga mga propesor ha rehiyon ha publiko labi na gud ha mga kabataan nga dire mahingalimtan lugod in tagaan hin importansya an pagkakaada hin hibaro bahin han mga nahitabo ha kasaysayan han Pilipinas.
Ini in kasumpay han selebrasyon yana nga adlaw han 77th Leyte Landing Anniversary kun diin sumala kan Dr. Clemelle Montallana, han Leyte Normal University, importante nga dire mahingalimtan labi na han mga kabataan yana nga henerasyon an nahitabo han mao nga panahon.
An Leyte Gulf Landing sumala kan Dr. Montallana in usa nga hinumduman han pagtuman ni General Douglas MacArthur han iya saad nga mabalik hiya ha Pilipinas para buligan an nasud ala kontra han mga Hapon.
Pero labot pa hini, in nanawagan gihapon an mao nga propesor nga dire dapat mahingalimtan han ngatanan an paghatag hin pagkilala ngan pagdayaw ha mga Pilipino nga nakipagbisog han mao nga panahon labi na gud an mga World War II veterans nga nabubuhi pa ha pagkayana.
An istorya han Macarthur Landing ngan Battles of Leyte Gulf in sadang daw nga maging susbaranan han ngatanan yana nga nag aagi kita ha giyera o ayat han COVID-19 pandemic kun diin kinahanglan nga magkaada hin pagbinuligay ngan bayanihan agud nga mapuypoy an problema.
