Posible nga humitaas an presyo han pira nga utanon ngan isda mahitungod han danyos nga durot han Habagat ngan mga naglabay nga Bagyong Luis ngan Maymay ha mga umhanan ngan pangisdaan.
Ha datos manggud han Department of Agriculture (DA), umabot na ha P1.4 billion an danyos han mga naglabay nga kalamidad ha sektor han agrikultura.
Mahitungod ha duro nga pag-uran ngan pagbaha, humitaas an presyo han pira nga utanon tikang ha Cordillera, Central Luzon, ngan Southern Tagalog.
Subay ha DA, sumaka an presyo han cauliflower ha P180 kutob P350 tikang ha P120 kutob P270.
An pechay Baguio naman in ada ha P40 ngada ha P150, samtang an carrotts in umabot na ha P170 kada kilo.
Humitaas gihapon an presyo han repolyo, ampalaya, tarong, ngan sitaw.
Pati an presyo han isda in humitaas gihapon.
Naabot na ha P400 kada kilo an galunggong, samtang an bangus in ada ha P160 ngada ha P320 an kada kilo, ngan an tilapia in ada ha P200 an kada kilo.
Ha Benguet naman, pira nga paag-uma an napiritan nga iglabog an ira mga harvest nga carrots ngan repolyo mahuman madunot samtang naghuhulat nga maibiyahe ngan maibaligya ha La Trinidad.
Subay ha DA, nakapwesto na an mga bulig paa ha mga apektado nga parag-uma, kaupod an mga recovery loan package agud mabuligan hira makabakdaw.
