NATIONAL NEWS– Pumalag an grupo han parupangisda nga Pambansang Lakas ng Kilusang Mamamalakaya ng Pilipinas (Pamalakaya) an paghamubo han presyo tawilis (Sardinella tawilis) ha P100 kada kilo tikang ha anay presyo hine nga P250, kadungan han mga report han nagkakawara nga sabungero nga gin-aaligar ginlabog ha Taal Lake.
Subay ha Pamalakaya, naka-karawat hira hin report tikang ha pira nga lugar sugad han Cavite nga an tawilis in ginbabaligya ha presyo nga P100 kada kilo.
Nagpahayag gihapon an nasabi grupo hin pagkabaraka ha mga parupangisda tikang ha mga lugar nga nakapalibot ha Taal Lake Batangas, nga nakaka-abat hin kahadlok ha pagpalit hin isda ha nasabi nga lugar.
Dugang pa ni Fernando Hicap, pangulo han Pamalakaya, kun magpapadayon an sugad nga presyo, sigurado nga mahamubo an farm-gate price hine para ha mga parupangisda han Taal Batangas.
