TACLOBAN CITY – Makikit-an na ha LED screen nga naka-display ha igbaw han Chicken section ha may Quezon Boulevard an mga presyo han papliton ha merkado-publiko han syudad han Tacloban.
Sumala kan Tacloban City Supermarket OIC Market Superintendent, Ricardo Ogardo, ngatanan nga parte han merkado tikang ha trading post kutob ha fish section in makikita an kada-usa nga presyo ha screen.
Labot pa hini, kada-section han merkado in may-ada nagpakabutang nga price monitoring board kun diin nakalista gihapon an mga presyo han produkto ha partikular nga section.
Panuyo naman han LED screen nga mahibaro an mga mamaralit han presente nga presyo han mga papliton—kun may-ada ba nagin paghitaas o steady la an presyo—sugadman in dire malimbungan an mga mamaralit han mga naniningabot nga paru-paninda.
Dugang pa ni Ogardo, kada-adlaw hira naga-update han presyo nga ginpapakita ha screen kun diin an kolor pula nga presyo in kanan yana nga adlaw ngan an sapit naman in kanan kakulop, panuyo hini nga mahibaruan kun may-ada nagin pagkiwa han presyo han partikular nga produkto.
Posible naman maatubang ha reklamo an paru-paninda nga dire magsusunod ha nakabutang nga presyo ha screen.
