TACLOBAN CITY – Ginlalauman an pagkamay-ada hin pagkiwa ha presyo han mga pangunahon nga papliton mahitungod han kasamok nga nahitatabo ha Middle East sugadman an pagsasarado han Strait of Hormuz.
Ini in sumala kan Department of Trade and Industry Eastern Visayas Consumer Protection Division Chief, Eleanor Etulle.
Ha kaluyo hini, gin klaro gihapon ni Etulle nga ha pagkayana in waray pa makikita an epekto han pag-umento han presyo han mga papliton.
Kun diin, basar han ira monitoring ha mga presyo han papliton in waray pa pagkiwa ha mga presyo hini.
Dugang pa hini, waray pa gihapon hira datos kun pira an magigin umento ha mga presyo mahitungod nga maghaharampang pa an mga tagamangulo han ira buhatan agud magsarabot han igpapatuman nga presyo.
Samtang, nanawagan naman ini ha mga establisyemento nga dire la anay magpatuman hin umento ha mga DTI-monitored products mahitungod nga ini la an ginlalauman ngan gintatapuran han mga kunsumidor nga waray pa igin umento ha mga presyo.
Ha oras naman nga madakpan nga nag-umento an mga establisyemento bisan waray kamaduan tikang ha Department of Trade and Industry in magpapalusad hira hin Letter of Inquiry ha dabi nga tindahan.
Mababaruan naman nga sarado la an Strait of Hormuz ha mga barko nga tikang ha Estados Unidos, Israel, ngan Europa.
