Dire ginlalauman han Department of Energy nga mabalik ha pre-war level an presyo han lana ha madagmit nga panahon mahitungod ha padayon nga tensyon ha Middle East.
Sumala kan DOE Sec. Sharon Garin, nagpapabilin nga hitaas an presyo han petrolyo kutob ha paghuhuman han tuig mahitungod ha sitwasyon ha Middle East ngan an balyuay han piso kontra dolyar.
Samtang, ginmalatumat ni LTFRB officer-in-charge, Greg Pua, nga may notisya hira nga nakakarawat nga nauli na ha ira mga probinsya an pira nga mga jeepney drivers mahitungod ha hitaas nga presyo han lana.
Dugang naman hini, padayon nira nga ginmomonitor an sitwasyon ngan posible maghatag an gobyerno hin P5,000 nga ayuda para ha transport sector samtang, nagpapabilin naman an P12 kada litro nga fuel discount para ha public utility vehicles.
Ginsumite na gihapon han DOE ha Malakanyang an certification para ha posible nga suspensyon han excise tax ha petroleum products, pero waray pa pinal nga anunsyo hi Pres. Ferdinand “Bongbong” Marcos Jr.
