NATIONAL – Humitaas pa an presyo han kamatis ha mga merkado, basar ha monitoring han Department of Agriculture.
Ha urhi nga update han buhatan, humitaas na ha P360 kada kilo an presyo han kamatis, labi na an mga muupay nga kalidad.
Sumala ha ahensya, an usa nga kilo han kamatis in mas mahal pa kaysa ha usa nga kilo han manok nga maabot la ha P240 kada kilo.
Basar ha DA, an mga medium-sized nga kamatis in maabot na ha P20.00 kada usa o mas sobra pa.
Una nga ginpahayag han buhatan nga an mga magkakasunod nga bagyo nga naigo ha Pilipinas an pangunahon nga rason nga naka-apekto ha suplay ngan presyo han mga agricultural products, pangunahon na an mga utanon sugad han kamatis.
Labot la ha kamatis, ginbabantayan gihapon han DA an paghitaas han presyo han siling labuyo ha mga merkado.
Basar ha update han buhatan, maabot na ha P1,000 an kada kilo ha presyo han siling labuyo tikang ha anay P900 kada kilo.
