TACLOBAN CITY – Ginpahayag han pira nga mga grains retailers ha rehiyon nga habubo an presyo ha pagkayana han humay.
Sumala kan Frederick Dy, presidente han Grains Retailers Confideration (GRECON) Eastern Visayas, ini in mahitungod han pag-inuran tikang han naglabay nga semana kun diin maghulos an mga humay ngan maiha an pagpapauga han mga ini.
Dugang pa hini nga an humay nga ginpapasa ha mga rice millers in maghulos o magbug-at sanglit habubo an presyo han pagpalit hini.
Ha pagkayana in ada ha 14 pesos kada kilo an presyo han humay nga maghulos ngan 15 pesos naman han mga uga nga palay.
Ginlalauman naman nga magpapabilin an mao nga presyo ha harvest season sugadman kun dire la gihapon umundang an pag-inuran tungod nga dire gud mapapalit an mga maghulos nga mga humay sanglit pira ha mga parag-uma in mapipiritan nga igbaligya an mga ini ha mas barato nga presyo.
