TACLOBAN CITY – Ginlalauman an pag-atender ni Presidente Rodrigo Duterte ha ikaunom nga anibersaryo han pag-igo han Supertyphoon Yolanda yana nga maabot nga Nobyembre 8.
Una hini, sumala kan Ronnie Cornico, tagapagyakan han Tacloban City government, padayon an ginbubuhat nga pangandaman han syudad para ha mao nga selebrasyon ngan nakalatag na an mga pagbubuhaton nga aktibidad.
Pira ha mga ini an misa, blessing han mass grave ha Holy Cross cemetery, commemorative program, candle lighting ngan iba pa.
Dugang pa hini nga magiging highlight ha mao nga selebrasyon an inagurasyon han water system ha northern barangays para ha mga Yolanda survivors nga nag-uukoy ha mga resettlement sites nga maiha na nga ungara an problema ha suplay han tubig.
Papangunahan naman ni Pangulong Duterte an inagurasyon han mao nga water system kaupod an iba pa nga mga dumagko nga opisyales han gobyerno.
