NATIONAL NEWS– Magpapadayon yana nga adlaw Hunyo 22 an pre-trial conference para ha impeachment trial ni Vice President Sara Duterte, kun diin huhumanon han magkaluyo nga grupo an panmarka han ebidensya ugsa an pormal nga hearing ha Senado.
An pre-trial in nagsesebi nga initial meeting han defense ngan prosecution panel ugsa nga lumingkod an mga senador kumo impeachment court.
Mababaruan nga nakatalaan nga magtikag an aktwal nga impeachment trial ha Hulyo 6.
Ha pagkayana, ginpapag-adman ngan gintatadong pa han duha nga kampo an mga dokumento nga kanit ha upat nga articles of impeachment ala-kontra ha Bise Presidente, kalakip na dinhi an misuse of funds, unexplained wealth, bribery, ngan iba pa nga alegasyon.
Sumala kan Atty. Michael Poa, defense team ni VP Sara, nahuman na nira an panmarka ha pira nga mga ebidensya nga kaparte han kaso, pero kinahanglan pa hin kadugangan nga panahon para ha mas damo pa nga dokumento nga may kasumopay ha pira nga mga isyu.
Ha kaluyo hine, ginpangunahan han Senate Secretariat an proseso kumo impeachment court, ngan makikiparte naman an prosecution panel tikang ha House of Representatives.
Subay ha House prosecution team, naisalawad na nira an ira pre-trial brief ngan an mga dokumento para ha mga senator-judges.
Nakapukos gihapon hira ha pangandaman han ebidensya ngan dire ha ihap hiton botos nga kinahanglan para masirotan iton bise-presidente.
Manunumduman nga hi Sara Duterte, in na-impeach han nakalabay nga Mayo 11,k mahuman nga makakuha hin botos nga 257 ha Hamubo nga Kapulungan han Kongresos, kanit ha mga alegasyon ha sayup nga paggamit han pondo ngan iba pa nga isyu.
