NATIONAL – Gin babana-bana nga maabot ha 123.96 milyon an kabug-usan nga populasyon han Pilipinas pag-abot han tuig-2035, o duganga purluminos 14.76 milyon katawo ha sulod han masunod nga 15 katuig, subay ha pinakaurhi nga projection han Philippine Statistics Authority (PSA).
Subay ha PSA, ginlalauman nga maribhong pa an populasyon han nasud ha average nga 0.85% kada tuig tikang han 2020 kutob 2035, tikang ha nahipatik nga 109.2 milyon nga populasyon dida han 2020.
Magpapabilin nga pinakamatawo nga rehiyon an CALABARZON nga ginbubug-os han Cavite, Laguna, Batangas, Rizal, ngan Quezon nga ginlalauman maabot ha 19.07 milyon an populasyon pag-abot han tuig-2035.
Sumunod an National Capital Region (NCR) nga mayda 14.49 milyon ngan Central Luzon nga mayda 14.02 milyon.
Samtang, ginlalauman nga magpapabilin nga mayda pinakaguti nga populasyon an Cordillera Administrative Region (CAR) nga mayda 2.13 milyon.
Subay ha PSA, pira nga rehiyon an ginlalauman nga makakapaghipatik hin paru-padayon nga paghitaas ha population growth rate, kaupod an Bicol Region, Western Visayas, Eastern Visayas, Zamboanga Peninsula, Soccsksargen, Bangsamoro Autonomous Region in Muslim Mindanao (BARMM), ngan Caraga.
Partikular nga ginmalatumat han PSA an BARMM, nga posible makaghipatik hin mas madagmit nga pagdamo han tawo, nga ginlalauman mahitaas ha 1.79% tikang ha 2030 kutob 2035, tikang ha 1.62% dida han 2020 kutob 2025.
Ha lain nga bahin, ginlalauman nga mahinay naman an population growth ha pira nga rehiyon sugad han NCR, Cagayan Valley, Central Luzon, Calabarzon, at Northern Mindanao.
