NATIONAL – Umabot ha kabug-usan nga 14,001,751 an ihap han populasyon han Metro Manila o an National Capital Region (NCR), subay ha 2024 Census han Philippine Statistics Authority (PSA) nga nasakop han 12.4% han kabug-usan nga populasyon han Pilipinas nga mayda 112 million dida han nakalabay nga tuig.
Tikang han tuig-2020, humitaas an populasyon han Metro Manila hin 517,289 katawo, tikang ha 13.48 million nga kabug-usan nga ihap hine.
Kun igkukumpara ha mga nakalabay nga tuig, an NCR in nakaghipatika hin paghitaas nga 1.12 million tikang han 2015 ngan 2.15 million naman tikang han 2010.
Usa dinhi an Quezon City nga mayda pinakadako nga populasyon ha NCR nga mayda 3.08 milyon katawo, sumunod an Manila nga mayda 1.90 milyon ngan Caloocan nga mayda naman 1.71 milyon.
Samtang, nahipatik naman an Pateros nga mayda pinakaguti nga populasyon ha NCR nga myda 67,000 nga residente, ngan an San Juan in mayda naman 134,000.
