TACLOBAN CITY– Talwas na an usa nga police mahuman ine nga maaksidente ha Brgy. Patag ha may Paranas-Taft nga dalan kakulop nga adlaw.
Ginkilala naman an biktima nga hi alyas “Jun”, 27 anyos, residente han Poblacion Dos, Paranas, ngan usa nga aktibo nga miyembro han Philippine National Police (PNP) Mobile Force ha Arteche Eastern Samar.
Sumala kan PCPT. Manuel Ricalde Jr., Chief of Police han Paranas Municipal Police Station, nawarayan hin kontrol an driver han Hyundai Accent kun diin bumungo ini ha poste hin usa nga street light, ngan nagdiretso ha usa nga poste hiton SAMELCO ngan water tank.
Dugang pa ni Ricalde, gin-aaligar naman nga madagmit an pagpadalagan han nasabi nga police ha iya ginmamanihuan nga sarakyan.
Mababaruan nga nakag-angkon ine hin kasamdan ha magkalain-lain nga parte han iya lawas.
Nanawagan naman hi Ricalde ha tanan na mga nagamit hiton karsada nga magpukos ha pagmamaneho agud nga malikayan an disgrasya o makagkawsa hin disgrasya.
