TACLOBAN CITY- Guin klaro han usa nga pulis nga nagdrive han guin ambush nga sarakyan ha Giporlos, Eastern Samar nga waray ini nakarawat hin bisan ano nga panhulga ha iya kinabuhi.
Sumala kan PO1 Pocholo Abrugar nga an nahitabo nga pagkasunog han ira patrolya dida han magdudul-ong unta ini hin shabu ha Philippine Drug Enforcement Agency (PDEA) Regional Office 8 in may kalabutan ha problema han wiring connections nga nagresulta hin paggawas han aso ngan kalayo.
Dugang pa ni Abugar nga hiya guihapon an nagmaneho han nasunog nga sarakyan dida han natabo an insidente.
Manunumduman nga guinpauranan hin bala an grupo han Giporlos PNP han guintututuhan nga miyembro han mga New People’s Army (NPA) ha boundary han Brgy. Paya ngan Sitio Salvacion Brgy. Biga, Giporlos Eastern Samar dida han nakalabay nga Huwebes samtang tipakadto unta ini ha Eastern Samar Provincial Office agud umatender hin seminar han PDEA.
Una na nga guinpamahayag ni PCInsp Clark Charavia, hepe han Giporlos PNP, nga samtang guinsusubay an mao nga lugar han mga kapulisan in tigda nala nga bumuto an Improvise Explosive Device (IED) ha kaluyo nga lane han kalsada kun diin humagos naman hin 20 minutos an naging balyuay han buto ha magkaluyo nga kampo.
Samtang, mapasalamaton naman hi PO1 Abrugar nga waray samaran ha ira han-ay.
Mababaruan nga sakay ha guin ambush nga patrolya hira SPO4 Teodoro Tan, SPO1 Raul Graza, PO1 Alexander Sevillano ngan PO1 Pocholo Abrugar.
