NATIONAL – Nakatirok hin dire maubos ha P20 milyon an nakolekta nga kantidad han Philippine National Police (PNP) tikang ha charity boxing match nga gindumara kakulop nga adlaw, Hulyo 27.
Sumala kan PNP Chief PGen. Nicolas Torre III, nakakolekta an ira buhatan hin sobra P16.3 milyon nga kantidad han mga donasyon samtang nakakarawat gihapon an mga ine hin bugas, de-latae, ngan iba pa nga relief items tikang ha magkaduru-dilain nga sponsors hine.
An nasabi nga pondo ngan relief items in an igpapanhatag ha mga naapektaran han mga naglabay nga bagyo kun diin syahan na nga nanhatag an PNP ha mga residente ha Baseco Compound nga usa ha mga lugar nga ginbaha durot han padayon nga pag-inuran dida han mga nakalabay nga adlaw.
Samtang, an iba pa nga pondo in iginhatag na ha buhatan han Department of Social Welfare and Development (DSWD), Philippine Red Cross (PRC), ngan magin ha iba pa nga government organizations ha Quezon City.
Naipaabot naman na an mga pauna nga bulig ha mga sakto nga ahensya ngan pira nga residente samtang padayon naman ha ira pag bulig ha mga relief operation an kapulisan kumo pagpapaabot han bulig ha mga duro nga naapektaran han mga kalamidad.
Nagpasalamat naman an hepe ha mga bumulig ha nasabi nga programa ngan magin ha mga sponsors nga naghatag han ira bulig agud magin malinampuson an nasabi nga charity boxing match.
