NATIONAL – Ginsigurado han Philippine National Police an ira hul-os nga suporta ngan pakikipag-bubligay ha ginbubuhat nga inspeksyon han Department of Public Works and Highways ha mga pangunahon nga proyekto nga may kalabutan ha flood control projects ha magkadurudilain nga parte han nasud.
Ini in usa nga direkta nga baton ha panawagan nga ginpaabot ni Pres. Ferdinand Marcos Jr. nga nanawagan para ha usa nga tangkod, maupay, ngan waray halo han korapsyon nga pagpapatuman han tanan nga proyekto pan-imprastraktura han gobyerno.
Sumala kan Acting Chief PNP, Police Lieutenant Gen. Jose Melencio Nartatez Jr., an tanan nga unit han pulisya ha bug-os nga nasud in nakaandam ngan nakaalerto agud maghatag hin seguridad ngan proteksyon samtang an tawo han DPWH in aktibo nga magbubuhat han ira inspeksyon ha magkadurudilain nga flood-mitigation site o mga lugar kun diin ginbuhat an mga flood control projects.
Dugang pa hini nga importante an papel han PNP ha pagsigurado han katalwasan dire la han publiko, kundi pati na gihapon han mga nasabi nga proyekto nga may dako nga maibubulig ha komunidad ha ira pag-atubang ngan pagbaton ha mga problema kasumpay ha mga pagbaha.
Kasumpay gihapon hini in naghatag hin direktiba hi Nartatez ha tanan nga regional ngan lokal nga buhatan han pulisya nga dayon makipag-sumpayan ngan makig-coordinate ha DPWH ngan ha mga lokal nga pangobyernuhan agud masigurado an usa nga maupay, mahimyang, ngan talwas nga pagbisita ngan inspeksyon ha tanan nga flood-control sites.
