Gin pahinumduman han Philippine National Police (PNP) an mga tawuhan hini nga magin responsable ha paghihirot han ira mga pusil, labi na kun waray hira duty ngan ada ha ira mga balay.
Sumala kan PNP chief Gen. Jose Melencio Nartatez Jr., kinahanglan siguraduhon nga talwas ngan dire maaabot han kabataan o iba pa an ira mga pusil.
Kasunod ini han duha nga magkabulag nga insidente han pamusil ha mga iskuylahan ha sulod la han haros duha kabulan.
Dida han Hunyo, tulo nga istudyante an namatay ha usa nga school shooting ha Tacloban City. Yana nga semana naman, duha nga istudyane, kaupod an gunman, an namatay ha insidente ha Ateneo de Zamboanga University.
Ha duha nga insidente, ginamit han mga menor de edad an service-issued firearms nga kinuha tikang ha ira pamilya o kag-anak.
Iginmando gihapon han PNP ha police commander nga regular nga magpahinumdom kasumpay ha sakto nga pag-hirot ngan pagbaton kada unit briefing ngan formation.
Samtang, ginmalatumta han PNP chief nga mag-aalutaga an PNP hin mga tawuhan ngan kagamitan para ha national school safety drills han Department of Education nga nakatalaan ha Agosto 25.
