Gin manduhan han Philippine National Police (PNP) an mga police commanders ha bug-os nga nasud nga pahugtan an pagsunod ha sakto nga waste segregation ngan displosal kumo kaparte han pagbaton han gobyerno ha nagtitikaduro nga problema ha basura.
Sumala kan PNP chief Police Gen. Jose Melencio Nartatez Jr., kinahanglan magin modelo an mga pulis ha pagpapabilin han kalimpyo ha ira mga opisina ngan kumunidad.
Dugang pa hini, kinahanglan magtikang mismo ha mga police officer ngan yunit an sakto nga paglalabog ngan pagbuburublag han mga basura.
Sakop han direktiba an ngatanan han police officer ngan yunit, kaupod an mga precinct, police station, municipal, ngan city police stations.
Ginmanduhan an mga commander nga siguraduhon nga mayda magkakabulag nga basurahan para ha biodegradable ngan non-biodegradable waste.
Ginmalatumat han PNP nga susuportahan hini an panawagan nira Presidente Ferdinand Marcos Jr. ngan Interior Secretary Jonvic Remulla para ha mas mahugot nga pagpapatuman han mga pitad kontra ha problema ha basura.
Samtang, nagpatapod naman ni Nartatez nga mabulig an PNP ha mga lokal nga pangobyernuhan ha pagpapatuman han mga ordinansa kasumpay han sakto nga paglalabog han basuran.
