ODD NEWS- Makatarawa ngan imposible nga huna-hunaaon an hangin han usa nga singer/song writer in iginsulod ha sakob han usa nga plastic bag ngan pwede nga igbaligya ha kantidad nga $7,600 o katumbas han haros P400,000.
Nahitabo an transaksyon ngan pagbaligya ha website han usa nga e-commerce company nga eBay.
Ginpa-auction han eBay seller nga may username nga imacanon16canz an usa nga resealable plastic bag nga may sulod nga hangin tikang ha concert han sikat nga American rapper ngan singer/song writer nga hi Kanye West nga gindumara ha Mercedez Benz stadium ha Atlanta, Georgia han nakalabay nga bulan han Hulyo.
Gintambungan an mao nga concert hin maabot 40,000 fans ni West pero may iba nga waray makapagkita hin live mahuman nga maubusan hin ticket.
Matungod dinhe, nahuna-hunaan han oportunista nga fan nga usa ha mga nakagkita hin live han mao nga concert, nga magtirok hin hangin ha mao nga event pinaagi han plastic bag.
Nagtikang ha $3,333 an bidding price hine hangtod nga umabot $7,600 o katumbas han P377,000.
Waray naman igmalatumat an pangilal-an han avid-fan nga gumastos hin sugad nga kantidad agud nga makuha la an plastic bag nga may sulod nga hangin.
Mababaruan nga dire ine an syahan nga higayon nga naibaligya an hangin tikang ha concert ni West matungod nga han 2015, in naisubasta gihapon ha kantidad nga $65,000 an plastic bag nga may sulod nga hangin tikang ha iya konsyerto ha Yeezus.
