TACLOBAN CITY – Kasumpay han pagdudumara han National Crime Prevention Week (NCPW), gin sigurado han Philippine National Police an publiko nga madagmit na an pag responde han mga otoridad ha mga krimen ha kumunidad mahitungod nga nakikipagsumpayan an ira buhatan ha mga lokal na panggobyernohan sugad man hiton mga barangay.
Usa nga dako nga bulig an pag tawag ha 911 mahitungod nga mas madagmit nga nahihisumat ha mga kapulisan an nahihitabo sugad man mas malaksi an pag responde han mga ini kun may ada nahihitabo nga krimen ha usa nga lugar.
Sumala kan Asst. Regional Director, NAPOLCOM RO8 Atty. Rutchel Espinosa, pinaagi han pag bisita han mga otoridad ha kumunidad o barangay, an CADU o Community Accredit Development Unit in usa nga awareness program agud ig pa samwak ha mga mulupyo labi na ha mga kabatan-onan an mga kinahanglan buhaton agud malikayan an pagkdabi ha krimen.
Dugang pa ni Asst. Regional Director, NAPOLCOM RO8 Atty. Rutchel Espinosa, usa ha mga pitad nga nakakabulig ha mga otoridad agud mas maipasamwak ha mga kabatan-onan kun patiunan-o makakalikay ha mga buruhaton nga diri maupay in an SCPC o Student Crime Prevention Committee.
Pinaagi han sakto nga pagpapasarang han mga impormasyon ngan pag-giya ha mga student council ha kada eskwelahan, dida pala ha sulod han eskwelahan in maging epektibo na an nasabi nga programa ngan malilikayan an pag damo han krimen ha kumunidad.
Ha lain nga bahin, sumala naman kan Espinosa, diri hiya pabor ha pag papahamubo han edad han criminal liability ha mga menor de edad mahitungod nga mas gin aabrehan ngan magigin prone lugod an mga kabatan-onan ha mga krimen labi na yana nga panahon hiton digital age.
Suhestyon lugod ni Espinosa, labot ha pag papahamubo han liability han mga menor de edad in mas maupay buhaton an mas pag tutok han mga kag-anak han ira mga responsibilidad ha ira mga anak agud masiguro nga an nga kabatan-onan in diri mahihingadto ha karat-an. (via Bombo Niña Magpili)
