TACLOBAN CITY– Maabot na ha sobra 1K nga mga pamilya an ginpanbakwit ha Catubig Northern Samar matungod han waray wantas nga pag-inuran.
Sumala kan John Lindon Pujante LDRRMA Operation Section Chief, Catubig Northern Samar, nga posible pa ine nga madugang matungod nga padayon pa an pag-inuran.
Dugang pa han mao nga opisyal, nga padayon an ira ginhihimo nga rescue operasyon matungod nga mayda pa iba nga mga pamilya nga nagpapabilin ha ira tagsa-tagsa nga panimalay an dire pa nag-eevacuate.
Mababaruan nga mayda na gihapon pira nga mga barangay an nakaka-experyensya hin pagbabaha ngan sugadman mayda gihapon mga kakarsadahan nga unpassable pa ha mga 4 wheels vehicle matungod ha mga nagpanpan nga mga tuna.
Nagpahimatngon naman an mao nga opisyal ha publiko nga padayon nga mag-ikmat an mga ine ilabi na yana nga malain pa an panahon.
