TACLOBAN CITY– Aminado an pira nga mga negosyante nga nakakabaraka an pagsarado han pira nga mga establisyemento ha syudad han Tacloban.
Sumala kan Regional Governor Philippine Chamber of Commerce and Industry, Eugene Tan, nga nakaka-apekto ine ha ekonomiya hiton Leyte partikular na nga an Tacloban an sentro han pakabuhi ngan panegosyuhan.
Usa ha mga nakikita nga rason in matungod nga kamahal magtindog hiton negosyo, ngan sugadman pag-asikaso hiton mga dokumento ngan business permit han usa nga negosyante.
Ginkikita gihapon nga rason hine an kahitaas hiton bayad han renta, ngan nakaka-apekto ine ha panrabahuan.
Dugang pa hine, dire karuyag sidngon nga damo an nag-aabre in pwede na magsara an pira nga mga establisyemento matungod nga dire maupay kitaon nga implekasyon ha pan-ekonomiya.
Naglalaom naman hi Tan, nga mapapanginano ine hiton local nga pangobyernuhan agud ga matagan ine hin kabatunan ha dagmit nga panahon.
