TACLOBAN CITY – Ginpahayag han pira nga grupo han mga driver/operators ha siyudad han Tacloban nga nagpapabilin la gihapon nga gutiay an ira kuheda ha luyo nga nadamo na yana an ira manarakay.
Sumala kan Leo Templado, Board of Director han Tacloban Marasbaras Drivers’ and Operators’ Transport Cooperative, nakukurian la gihapon hira nga makakuheda hin durudako yana bisan nga nagdamo na an mga pasaheros matungod nga limitado la gihap an ihap han ira mga pasaheros kada biyahe tungod han ginpapatuman nga social distancing.
Ha luyo hini in diri naman daw hira natipa ha mao nga kamanduhan tungod nga ini in parte han ginpapatuman nga health protocols ha paglikay ha COVID-19.
Naghangyo naman ini ha mga commuters nga intindihon an ira sitwasyon ngan diri na magreklamo ha ira umento nga 1-2 pesos tungod la an ira ginlalauman nga panbawi ha ira kuheda.
