TACLOBAN CITY – Ginkakalipay han pira nga mga driver ngan operators an ginlalauman nga utro nga pagpatuman hin rollback yana nga semana ha presyo han produktong petrolyo.
Sumala kan Joseph Tangile, Presidente han MCH driver and operators han Tacloban, nga hul-os an ira magigin kalipay pananglitan nga umabot ha P40.00 an kada litro han gasolina, ha sugad nga pamaagi in makakabawi-bawi an mga ine ha ira pamasada.
Mababaruan, nga una na nga nagpahayag han iya araba an mao nga opisyal, kasumpay ha dire pa ginpapamatian nga hangyo han mga MCH drivers nga magkamayda hira hin fare increase ha syudad.
Ginmalatumat naman han nasabi nga opisyal, nga an ira nala lalauman in an pag-abre han face to face classes, kun diin magkakamayda hira hin mga estudyante nga pasaheros nga dako nga bulig ha ira pagpapakabuhi.
