TACLOBAN CITY – Nagpahimatngon an usa nga manbaralaod hiton syudad han Tacloban nga mayda kaangayan nga penalidad nga kakatubangon o babayaran iton tag-iya han sarakyan nga mai-impound hiton towing truck.
Sumala kan Atty. Jerry Uy, City Councilor hiton Tacloban City, may towing fee nga babayaran iton tag-iya han sarakyan nga makukuha hiton towing truck kun diin madepende ine kun light vehicle or heavy vehicle an sarakyan.
An light vehicle nga mato-tow in mayda penalidad nga P1,500, P2,500 naman para ha medium vehicle, ngan P4,500 naman an babayaran hin heavy vehicle an klase han sarakyan para hiton syahan nga upat kakilometro o kun tikang han lugar nga ginkuhaan han nasabi nga sarakyan tipakadto hiton impounding area.
Labot la hiton penalidad in magbabayad gihapon iton tag-iya hin P1,000 para hiton storage fee kun diin igbubutang iton nasabi nga sarakyan.
Hapagkayana in ada pala ha syahan nga pagbasa an nasabi nga ordinansa ngan padayun pa nga hihimayon.
