TACLOBAN CITY – Gin bawi han Tacloban City Agriculture Office an pira nga mga fish cage ha posesyon han mga paru-pangisda ha syudad nga waray magbabayad.
Sumala kan Tacloban City Agriculture Office Head, Romelo Anade, an Rent-to-Own Fish Cage Program han syudad in dire na bag-o nga programa mahitungod nga dida pa ine pagtikang han kahuman han paglasurbo han Super Typhoon Yolanda kun diin an syudad han Tacloban an pinaka naapektaran.
An pira nga Rent-to-Own Fish Cage in gin award ha pipira nga mga nagkukuri nga paru-pangisda han syudad, pero mayda gihapon hine libre nga ginhatag han buhatan ha pira la liwat nga mga paru-pangisda nga ada ha mga mariculture zone han syudad.
Babaydan naman ha sulod hin 10 katuig an nasabi nga mga rent-to-own fish cage, kun diin an kada usa hine in nagkakantidad hin P160,000 upod na an 7,000 nga mga fingerlings.
Karuyag sidngon, kada tuig in mabayad hin P16,000 an mga paru-pangisda pero mahitungod nga dako manggud an nakukuhida han mga ine ha pangisda pinaagi han mga fish cages in gintitigda nala han mga ine an ira pagbayad.
Samtang, mayda naman daw pira nga dire gud nabayad bisan paman kun nakaka-kuhida gihapon an mga ine sanglit ginbawi nala ine han mga taga-City Agriculture Office ngan paparentahan liwat ha iba nga interesado nga paru-pangisda.
