TACLOBAN CITY– Padayon an pagka-abot hiton mga delegasyon kaupod an mga atleta ha Maasin City, ine an ira ika-duha nga lugar kun diin igpapadayon an mga paisan-isan han Eastern Visayas Regional Athletic Association (EVRAA) 2025.
Una hine, nagin malinampuson an kahuhuman la an syahan nga hugna hiton prestehiyuso nga paisan-isan ha Dolores Eastern Samar, ngan ine in naging marisyon ngan mahinungdanon ha tanan nga mga deligasyon.
Sumala kan Caretaker, Southern Leyte Police Provincial Office/ Current Chief Regional Investigation Division, Poilice Regional Office 8, PCOL. Raymund Gravales, maabot na ha sobra 1, 713 na partisipant an presente yana nga aadto ha Maasin City agud nga maki-usa ha nasabi nga paisan-isan.
Ha mao nga ihap, ada ha 243 nga partisipante an tikang ha Eastern Samar, 213 naman ha Catbalogan Samar, 392 Samar Division, 278 Borongan City, 290 Baybay City, 237 Leyte, ngan 60 naman an Calbayog City.
Ha pagkayana, padayon nira nga ginpapamulat an deligasyon han Ormoc City, Northern Samar, Biliran, ngan an mga officiating officials.
Ginlalauman nira nga maabot ha 4,029 an kabug-usan nga deligado nga maatinder ha nasabi nga paisan-isan.
Ginpaangbit pa hine nga han nakalabay pa nga Lunes, nagka-abot an mga atleta ngan pira nga deligasyon kun diin presente an mga ine aadto ha ira mga billeting areas, nga ginbabanatay naman hiton mga barangay officials ngan kapulisan.
Ha parti naman hiton seguridad, ginsisigurado ni Gravales, nga hapsay ngan mahugot an ira ginhihimo nga pagbabantay ha area kun diin pagdudumaraon an mga paisan-isan.
Nakikipag-koordinar naman ang mga ine ha mga head hiton kada billeting areas, nga likayan an pagpinagawas-sulod han mga atleta, agud nga malikayan an mga untoward incident.
Maabot an mga ine 370 an tanan nga mga tinaglawas nga nagbabantay ha mao nga areas agud nga masigurado an seguridad, ngan katalwasan han kada individuals hangtod nga mahuman an mga mulay han EVRAA 2025.
