TACLOBAN CITY – Pira daw nga kamisayan ha Brgy. 104, Salvacion, Tacloban City an namatay mahuman nga makakaon hin isda nga tamban nga baligya hin labasero.
Sumala kan Hon. Ronnel Soriano, Brgy. Chairman hiton Brgy 104 Salvacion Tacloban City, an nasabi nga labasero in “suki” nga parag-labas ha ira lugar sanglit kilala na daw ine han mga residente.
Ha pag-istorya pa hine, dida han pag-labas han labasero ha nasabi nga adlaw in gin purundukan daw ine dayon han mga residente ngan sugad han pirme nahitatabo kun naglalabas ine in ginpapantagan daw hine an mga kamisayan hin isda kun nadaop an mga misay para dire mag-samok ha mga mamaralit.
Kahuman daw pan-tagi han mga kamisayan hin isda, mga pira la kaminutos in napansin daw hine nga nag-iba an gios han mga misay kun diin an iba in ginpupuk-pok an ulo hine ha semento ngan an iba naman in nagkakalukso ngan namamatay na.
Nahibaruan naman nga taga-Tacloban la gihapon an nasabi nga labasero han isda kun diin nakumpra ine han iya ginlalabas nga isda ha Basey, Samar.
Pagka-kinabuwasan in bumalik naman ine ha ira lugar ngan naglibot haira barangay ngan nangaro hin pasaylo ha mga nagpaka-palit ngan dire daw hiya maaram nga sugad ngay-an an iya baligya.
Waray naman na ine himua nga dako nga isyu han mga nagpaka-palit mahitungod nga dire man daw ine tinuyo.
