Pira han pamilya nga namatyan, waray pa maka claim han assistance han MV Doña Paz
TACLOBAN CITY- Nagpapabilin nga dismayado an pamilya han pira nga nagkamamatay han nalunod nga MV Doña Paz, 30 anyos na an nakakalabay.
Nahisabutan nga dida han nakalabay nga semana, guindumara ha Tacloban City Astrodome an pagpagawas han maabot 200 mil pesos ngadto ha mga pamilya nga namatayan hin han mao nga barko.
Sumala kan Vilma Alfare nga lakip ha mga namatay an bugto hini nga hi Moises Alfare, nga kutob ha pagkayana in waray pa ini maka claim han unta assistance nga angay matagamtaman mahitungod nga waray dayon makaasikaso hin mga papeles an nanay hini.
Dugang pa ni Vilma nga umupod la ha iya uncle tipakadto ha Manila an bugto hini agud nga mangumpra hin bado pero waray ini maswertehe mahitungod nga namatay ini han pagkalunod han guinsakyan nga barko.
Manunumduman nga may routa tikang ha Leyte tipakadto ha Manila an MV Doña Paz dida han nakalabay nga Disyembre 20, 1987, kun diin aksidente nga nakabanggay hini an oil tanker nga MT Vector nga nagbilin hin 4, 386 nga patay samtang 24 la an mga nagkabubuhi.
