NATIONAL- Usa nga Filipina nurse practitioner an naatubang yana ha magkalain-lain nga federal charges ha Estados Unidos mahuman nga matahapan nga nagpapaluyo han usa nga healthcare fraud scheme nga nakapan-limbong ha Medicare ngan TRICARE hin haros US$1 bilyon (tinatayang P51.6 bilyon).
Ginkilala an suspek nga hi Marizel Yukee, residente han Las Vegas, nga gin-isyuhan hin warrant of arrest han United States District Court for the Southern District of Texas.
Ginkasuhan hiya nga conspiracy to commit healthcare fraud ngan wire fraud, healthcare fraud, conspiracy to pay and receive illegal kickbacks, ngan money laundering.
Subay ha mga federal prosecutor, target han operasyon an mga kalagsan ngan pasyente nga mayda grabe nga sakit, pinaagi han paghahatag han ira panginahanglan nga wound treatments, ngan pagkahuman in susuktan an mga ine hin government health programs.
Ginkakanit gihapon hi Yukee ha operasyon han upat nga wound-care clinics ha Texas, Nevada, California, ngan Hawaii, kun diin gin-aaligar nga nagbabayad hin ilegal nga kickbacks kabalyo han patient referrals.
Subay ha imbestigasyon, ginpe-peke gihapon an medical records han mga pasyente ngan nasukot hin mga serbisyo nga dire naman kinahanglan, kun diin nakaka-karawat an mga ine hin milyon-milyon nga dolyar nga kickbacks.
Subay ha mga prosecutors, gin-aaligar nga gingagamit an mga nakuha nga salapi ha luho, ngan mga marahalonnga ari-arin, kalakip na an Ferrari supercar nga nagkakantidad hin US$500,000, mga alahas sugadn hiton Bulgari necklace nga maabot ha US$865,000, usa nga balay ha Hawaii ngaginbabana-bana nga US$1 million, sugadman usa nga beach resort project ha Santa Ana, Cagayan ha Pilipinas nga umabot ha US$4.6 million.
