VIRGINIA, USA – Usa nga kabayo nga nagngangaran nga “Fancy” an opisyal nga ginkilala han Guinness World Records kumo ‘Oldest Living Horse’ ha bug-os nga kalibutan, nga umabot ha edad nga 37.
Sumala ha tag-iya hini nga hi Paige Sigmon Blumer, nagtikang an ira halarom nga pag-urupod dida han late 90s. Nakilala han hadto walo ka-tuig pala nga hi Paige hi Fancy nga 12-anyos naman hadto ha usa nga training facility.
Dayon nga nabighani an bata ha kaisog ngan kusog han kabayo, labi na han masabtan ini nga ginsalbar ni Fancy an asawa han anay trainer tikang ha usa nga nalupad nga yero hadto han may makusog nga bagyo.
Tikang han paliton hiya han pamilya ni Paige dida han tuig 2000, nagin permanente na nga miyembro hi Fancy han ira pamilya.
Kumo usa nga American Quarter Horse, kadaras-an naabot la ha 25 kutob 35 ka-tuig an gini-iha han lahi ni Fancy. Pero mahitungod ha maupay nga pag-atiman, sakto nga nutrisyon, ngan regular nga pag-checkup ha mga beterinaryo, nalahusan niya an iya life expectancy.
Ha kaluyo naman ha iya kalagas ngan sakit nga Cushing’s disease, kun diin kinahanglan nga kumaon hin mahumok ngan nakababad nga pagkaon mahitungod ha isyu ha panunaw, nagpapabilin naman nga mahimsog an panlawas han kabayo.
