TACLOBAN CITY – Ginlalauman nga makakaghatag hin supresyente nga suplay hin kuryente ha Eastern Samar an pagtitindugon nga masobra PHP250M solar power plant project ha Brgy. San Rafael, Taft, Eastern Samar.
Kakulop, Abril 20, gindumara an ground breaking ceremony han proyekto kon diin gin pangunahan ini ni Taft Hydro Energy Corporation CEO Ruben Diego Picardo kaupod hi 4Ps Partylist Representative and Minority Leader Marcelino ‘Nonoy’ Libanan, Department of Energy Undersecretary Sharon Garin ngan iba pa nga opisyales han gobyerno.
Kon matapos na ini nga proyekto ,ginlalauman makakag-generate ini hin 20 megawatts nga kuryente nga makakadugang ha nauna na nga nakompleto nga 16- megawatts nga hydropower plant project nga ginpapadalagan gihapon han Taft Hydro Energy Corp.
Tungod hini mas magigin stable iton dalagan han kuryente ngan maiibanan iton naeeksperyensiyahan nga mga brownouts ha Eastern Samar.
Gin aaghat liwat ni Libanan an Eastern Samar Electric Cooperative ( ESAMELCO ) nga pumalit hin kuryente ha Taft Hydro Energy Corporation para mas magburubarato iton kuryente nga ginpapalit han mga kunsumidor.
Ha pagkayana in P5.87KWH/H iton kabaligya han Taft Hydro han kuryente nga nage-generate ha ira planta samtang P15/KWH an power rate han ESAMELCO.
“Gusto natin di lang Eastern Samar ang makinabang sa mababang presyo ng kuryente, kundi ang buong Samar Islands.Walang ibang magpapaganda ng probinsya natin, kundi tayo at mayron na tayo. We are leading in the energy sector. Sana magtulungan na tayo na madevelop pa ang ibang rivers and hopefully, we could provide all the energy requirements in all islands in Samar,” pahayag ni Libanan.
Nagpatapod liwat an Eastern Samar Electric Cooperative (ESAMELCO) nga kikitaon nira an posibilidad nga makapalit hin mas barato nga kuryente ha Taft Hydro.
Yana manggud in mayda existing nga 20 ka tuig nga kontrata an ESAMELCO ha iba nga power plant rason nga dire pa ine makakapalit hin kuryente ha Taft Hydro.
Samtang, ginkalipay liwat ni Energy Undersecretary Sharon Garin iton inisyatibo han Taft Hydro Energy Corporation nga gumamit hin renewable energy.
Usa daw nga ambisyon han Department of Energy nga pag abot hiton 2030 in 35 porsyento na ha Pilipinas iton nagamit hin renewable energy.
Nagpahinumdom liwat ini ha mga taga Taft nga alagaan an ira surok hin enerhiya.
