NATIONAL NEWS | Nagpahimatngon an Philippine Space Agency (PhilSA) kasumpay ha posible nga paglaprak han mga debris tikang ha iginlunsar nga Long March 3B rocket han China ha kadagatan harani ha Palawan ngan Rozul Reef ha West Philippine Sea (WPS).
Subay ha PhilSA, iginlunsar han China an Long March 3B rocket tikang ha Xichang Satellite Launch Center kakulop.
Subay ha ira panginano, pira nga parte han rocket nga waray kasunog samtang pakadto ine ha kalarakan in posible ine nga matak-tak ha mga natudlok nga drop zone ha sulod han Exclusive Economic Zone (EEZ) han Pilipinas.
Kalakip ha mga lugar an Puerto Princesa ngan Quezon ha Palawan, sugadman ha Rozul Reef.
Ha kaluyo nga dire ginlalauman nga malaprak an mga debris ha mga komunidad, ginmalatumat han PhilSA nga posible la gihapon ine nga magdurot hin kadelikaduhan ha mga barko, eroplano, sakayan pandagat nga iba pa.
May posibilidad gihapon nga maanod an mga debris ngan mahingadto ha kaharani nga baybayon.
Dire gihapon gintatangal han ahensya an posibilidad nga gintatawag nga uncontrolled re-entry, kun diin posible nga mataktak ha atmospera an pira nga parte han rocket tikang ha kalarakan.
Tungod hine, gindidire ha publiko nga humirani, o puruton an anuman nga mga kakaiba nga butang nga posible tikang ha rocket.
