NATIONAL – Ginanunsiyo han Philippine Health Insurance Corporation an benefit package nga posible i-avail han mga miyembro nga nakakaabat hin heat-related illnesses ha butnga han mapaso nga panahon.
Sumala ha tagapagyakan han PhilHealth nga hi Dr. Israel Francis Pargas, an mga sakit nga sakop han nasabi nga benefit package in an heat exhaution, heat syncope o kun nahimatay/nahilo mahitungod ha sobra nga kapaso ngan heat stroke.
An coverage han benefit package in tikang ha P12,000 kutob P18,000.
Gineksplikar naman ni Dr. Pargas nga may magkadurudilain nga coverage depende ha serbisyo sugad kun ma-admit ha public o private hospital, kablas man o dire, in dapat waray na copayment o kabaraydan han miyembro ha porsyon han medical expenses.
Samtang, ginmalatumat gihapon ni Dr. Pagas nga bisan man dire kinahanglan maospital, puydi la gihapon makakuha hin benepisyo, kun diin, kun registered member na, waray na aaruon pa nga requirements.
