NATIONAL – Malinampuson nga nahuman an gindumara nga Philippine – Australia Army-to-Army exercise (PAAE) o mas kilala ha tawag nga Kasangga Exercises ha Camp Evangelista ha Cagayan De Oro dida han Martes, Hunyo 24.
Panuyo han nasabi nga paghag-id nga mas pahalarumon pa an kooperasyon ngan sumpayan han duha nga nasud labi na ha istoryahon han depensa ngan seguridad ha sulod han Indo-Pacific region.
Ha sobra usa kabulan nga paghag-id, 140 nga kasundaluhan tikang ha Hukbong Katihan ngan 90 nga kasundaluhan tikang ha Australian Army an nakiparte ha Kasangga 2025.
Kaupod ha ira nagin paghag-id an urban operations, breaching operations, tactical combat casualty care, jungle survival training pati na gihapon an mobility, counter-mobility ngan reconnaissance operations.
Gin aghat naman ni AFP Eastern Mindanao Command Chief LtGen. Rex Luis Bergante an duha nga kampo nga padayon nga pakusgon an ira mga sumpayan ngan kooperasyon ha ngaran han kahimyangan ngan kadig-on ha Indo-Pacific region.
Samtang, nagpahayag naman hin pasasalamat hi Australian Defense Force MGen. Mark Ascough para ha usa nga madig-on nga koordinasyon han Pilipinas ha ira nasud ha pagduduso han kaupayan ngan seguridad han nasabi nga rehiyon.
