METRO MANILA – Ginbasura han Korte Suprema an petisyon nga ginsumite ni anay Presidential Spokesperson Atty. Harry Roque kontra ha Quad Committee han Kamara nga nag-imbestiga hadto ha Philippine Offshore Gaming Operators o POGO.
Ha desisyon nga ginsurat ni Associate Justice Samuel Gaerlan, ginbasura han Supreme Court an petisyon ni Roque nga pugngan hiya ha pagkakadakop ngan pagdid-an an Quad Committee nga paatenderon hiya ha mga pagdungog ngan magsumite hin mga kinahanglan nga dokumento.
Nakabutang ha desisyon nga moot an petition for certoriari and prohibition ni Roque labi na nga naghuman na an 19th Congress dida han nakalabay nga tuig ngan ginbawi na gihapon an contempt order ha iya.
Manunumduman nga dida han 2024 in nag-convene an Quadcomm agud imbestigaran an mga iligal nga aktibidad nga maisusumpay ha operasyon han POGO ha nasud.
Ginimbitaran ha pagdungog hi Roque pero usa ka-beses la ini umatender ngan nagsumite na ini hin mosyon agud ipawaray bisa an subpoena kontra ha iya.
Samtang, sumala kan Roque nga nagsumite hiya han petisyon mahitungod nga gintalapas han Quadcomm an iya mga katungod.
