TACLOBAN CITY – Utro nga gindig-unan han Philippine Drug Enforcement Agency (PDEA) Regional Office 8 nga diri konektado ha ira an nadakop nga suspek nga nagpakilala nga daw in empleyado hiya han mao nga ahensya.
Una hini, ginduduon han naaresto nga suspek nga hi Michael Regala, 31 anyos an pangidaron, may live in partner ngan residente han Brgy. Canlapwas, Catbalogan City nga daw in usa hiya nga job order employee han PDEA 8.
Sumala naman kan PDEA 8 Regional Director Edgar Jubay, waray ini kamatuoran mahitungod hi Regala in usa la nira nga informant ngan iba daw ini nga kategorya.
Diri daw ini maikokonsidera nga empleyado han PDEA mahitungod nga kabulig la ini nira nga naghahatag hin impormasyon bahin han mga dabi ha ilegal nga droga.
Damo na gihapon daw an naihatag hini nga impormasyon nga naging rason ha pagkakadakop han pira nga mga ilegalista.
Mahitungod naman han pagkadabi gihapon hini ha ilegal nga droga, in napiritan nga ipagawas an identity hini nga kunta in dapat tago mahitungod nga usa hiya nga informant.
Samtang, ginpahayag naman han mao nga opisyal nga waray daw conflict ha butnga han PDEA ngan PNP mahitungod nga maupay man daw an ira ginbubuhat nga koordinasyon.
