TACLOBAN CITY – Ginpahayag han Philippine Crop Insurance Corporation (PCIC) Regional Office 8 nga maabot na ha 6,722 nga mga livestock raisers o paragbaboy an nakapagpa-insured ha ira buhatan.
Ini in kasumpay han ira programa nga Free Swine Insurance para ha mga livestock raisers ha mga lugar ha rehiyon nga dire pa apektado han African Swine Fever (ASF).
Sumala kan Benita Alberto, OIC Marketing and Sales Division han Philippine Crop Insurance Corporation (PCIC) Regional Office 8, ha pagkayana in maabot na ha 77, 367 nga mga baboy an insured han PCIC ngan 19.85 million pesos na ha kabug-usan nga pondo nga 43 million pesos an nagamit para hini.
Nanawagan naman ini ha mga hog raisers ha mga ASF free areas ha rehiyon nga magpa-insure na ha pinakaharani nga buhatan han PCIC kun diin kinahanglan la nga igpresentar han mga ini an photocopy han ira valid ID ngan Registry System for Basic Sectors in Agriculture (RSBSA) enrollment stab.
Ginklaro naman han mao nga opisyal nga an mga paragbaboy la nga rehistrado ha RSBSA an pwede nga makatagamtam han free swine insurance.
