NATIONAL NEWS– Gintagan pagkilala han Philippine Coast Guard (PCG) an mga tinaglawas han BRP Suluan (MRRV-4406) ha usa nga seremonya nga ginpangunahan ni Admiral Ronnie Gil Gavan ha Pier 15, Port Area, Manila.
An nasabi nga pagkilala in kasumpay ha ira maisog nga pagtuman han ira mandato nga Maritime Patrol palibot ha Bajo de Masinloc hadton Agosto 10, kun diin nalikayan an pagsulong han Chinese vessels.
Imbes nga hira an maiigo, an duha nga barko han China an nagbungu-ay.
Sumala kan Admiral Gavan, ginpakita han mga tinaglawas nga waray kaparehas nga dedikasyon ngan sakripisyo para ha katalwasan han mga parupangisda nga Pillipino ha West Philippine Sea.
Ginkilala gihapon an West Philippine Sea Group ha maupay nga koordinasyon ngan operasyon han impormasyon ha butnga han nasabi nga patrolya.
