TACLOBAN CITY – Aminado an Philippine Coconut Authority (PCA) Regional Office 8 nga dako nga kawarayan ha produksyon hin lubi ngan mga coconut farmers ha rehiyon an danyos nga naidurot han bagyong Odette bisan kun sobra duha na kabulan an nakakalabay tikang han pag-igo han mao nga bagyo.
Sumala kan Engr. Joel Pilapil, Regional Manager han PCA 8, maabot ha 3.5 million damage an naidurot han bagyo ha mga puno hin lubi nga totally damaged partikular na ha Southern Leyte.
Ini in dako nga kawarayan ha produksyon han lubi labi nga nahagos anay hin lima ngada unom katuig san-o nga makapatubo han mga ini.
Kumo pagbulig naman ha mga coconut farmers ha rehiyon, ginpagamit hin libre han PCA an mga chainsaws nira para ha clearing han mga nagkatutumba nga lubi nga pwede magamit han mga ini ha pagtindog hin ira mga panimalay.
Labot la nga nabuligan an mga coconut farmers pinaagi hini, nalimpyuhan o nahawanan gihapon an mga lugar nga nagkatutumbahan hin lubi nga ha mga masunod nga bulan in pwede na tikangan liwat an coconut production o planting.
