NATIONAL – Ginpatapud ni Presidente Ferdinand Marcos Jr. nga magpapadayon an iya administrasyon ha paghimo hin solusyon para mapaupay an sistema han edukasyon ha Pilipinas.
Nakarawat na niya an kopya han final report han Second Congressional Commission on Education (EDCOM 2), kun diin nakasurat didto an assessment han komisyon ha kahimtangan han edukasyon ha nasud.
Ha tulo ka tuig nga pag-aram han EDCOM II, nakit-an nira an mga problema ha edukasyon nga kinahanglan solusyonan, sugad han nagtitika ubos nga proficiency han mga estudyante, ngan iba pa.
Mayda na gihapon kopya hi Marcos han National Education and Workforce Development Plan (NatPlan), usa nga strategic roadmap o plano para ha edukasyon ha sakob hiton napulo ka-tuig, tikang yana nga 2026 tubtob 2035, kun diin ginbinuligay ini nga mahimo han DepEd, CHED, ngan TESDA.
Ha NatPlan nakabutang an mga solusyon para masolbar an krisis ha edukasyon ngan ha pagpa-uswag han panrabaho han mga indibidwal nga namag-human hiton kolehiyo.
Samtang, nag-alotaga naman hin Php1.3 trilyon nga kantidad an gobyerno para ha sector han edukasyon para yana nga 2026.
