LEYTE, LEYTE – Usa nga patay nga lawas in nakit-an nga naglulutaw-lutaw ha baybayon han Barangay Baco, Leyte, Leyte.
Gin kilala an biktima pinaagi han syahan nga nakakita hine ha alyas nga Sam ngan an ada ha 30-40 an pangidaron hine.
Sumala kan Leyte Leyte Municipal Police Station Officer in Charge, PCpt. Junriel Rosario, subay ha SOCO in waray naman nakit-an nga mga samad ha lawas han biktima.
Ha imbestigasyon, nakit-an an patay nga lawas nga nagpapalutaw-lutaw ha nasabi nga dagat hin usa nga paru-pangisda, nga dayon naman nag-aro hin bulig ha mga otoridad agud makuha ine.
An biktima in nakasul-ot hin yellow-green nga drifit t-shirt ngan naka-shorts hin asul, may-ada gihapon ine sul-ot nga sandal nga nakasuklon ha kamot han biktima, nga posible ginhimo hine nga pampalutaw.
Ada naman ha 5’3″ an kahitaas hine ngan medium build an panlawas, ngan army cut an kaarot.
Ha pagkayana in nakigkoordina na an nasabi nga istasyon ha mga kahigrani nga barangay agud mahibaruan kun mayda ba hira nawawara nga molupyo.
Samtang, sumala han doktor nga nanginano han biktima, drowning o pagkalumos an igin kamatay han biktima.
