TACLOBAN CITY – Usa nga patay nga lawas an nahikit-an ha baybayon han Brgy. Cambatutay Nuevo, Tarangnan Western Samar.
Ginkilala an biktima kan Alberto Asis, 63-anyos an pangidaron, parupangisda, ngan residente han Brgy. Balugo han nasabi nga Probinsya.
Sumala kan PCMSgt. Daniel Deño, Duty Investigator han Tarangnan Municipal Police Station, nahikit-an an patay nga lawas ni Asis han usa nga residente nga hi Lolito Galla, samtang tipakadto unta ine ha ira piggery para manubong han iya alaga nga baboy.
Basar han gindumara nga imbestigasyon han mga otoridad, asphyxia secondary to drowning an rason han pagkamata han biktima.
Subay naman han pakipaghimangraw han mga kapulisan ha mga residente han nasabi nga lugar, natabok an biktima tikang ha usa nga barangay pakadto naman ha Brgy. Cambatutay Nuevo, kun diin naglalangoy la ine para ‘mamangti’ o manguha hin isda.
Waray naman nakita nga foul play an mga otoridad ha natabo nga insidente.
