TABANGO, LEYTE – Patay na han mahikit-an an lawas han menor de edad nga biktima ha kadagatan harani ha Brgy. Sta. Rosa, Tabango, Leyte, maagahon han nakalabay nga adlaw, Abril 7.
Gin kilala an biktima kan alyas Nyl, 17-anyos an pangidaron, samtang an suspek in ginkilala kan alyas Fred, sobra 30-anyos an pangidaron, ngan residente han Brgy. Tugas, Tabango, Leyte.
Mababaruan nga nahipatik nga missing tikang han Abril 2 an biktima.
Urhi nga nakit-an an biktima nga nakasul-ot hin brown shorts ngan pink nga sleeveless crop-top han lumakat ine ha ira panimalay dida han Abril 2, kun diin sumala han mga kag-anak hine in waray daw naman ine kasinahi ugsa nga lumakat.
Sumala kan Tabango Municipal Police Station Chief of Police, PCpt. Anthony-Re Amora, gin aalegar nga selos an rason ha pagpatay han biktima, pero sumala ha pahayag han suspek, nagsumat daw an biktima haiya nga burod ine, kun diin mahitungod han kahadlok han suspek nga mapreso ine mahitungod nga menor de edad an biktima in nabuhat hine an krimen.
Subay naman ha mga testigos, urhi nga nakit-an an biktima ugsa an kawara hine nga kaupod an iya uyab nga suspek ha pagpatay ha biktima.
Nahibaruan gihapon nga umukoy hin pira kaadlaw an biktima ha balay han suspek ugsa an panhitabo.
Samtang, nakada na ha state of decomposition an lawas han biktima han mahikit-an ine kun diin nakahigot an li-og hine ha usa nga bato nga ginamit pampabug-at.
Ha pagkayana in arestado na an suspek ngan ada ha kustodiya han mga kapulisan.
