TACLOBAN CITY – Usa nga patay nga lawas han babaye an nakikit-an ha Brgy. Rawis Calbayog, City.
Ginkilala an biktima kan Rosemarie Luwason Labosta, 36-anyos an pangidaron ngan residente han Purok 2 Brgy. Rawis Calbayog, City.
Sumala kan PCpl. Wilfredo Montaño Jr. Duty Investigator han Calbayog City, dida han Nobyembre 11 nagsarit an biktima han iya asawa nga mangunguha daw ine hin utanon nga gaway.
Subay han mao nga opisyal, waray na makabalik an mao nga biktima kun diin mababaraka na an asawa hine ngan nag report ine han ika-12 han nobyembre ha mga kapulisan nga nawawara an iya asawa ngan dayun naman ine nga gin declare nga missing.
Dugang pa han mao nga opisyal, nga may-ada tumawag nga usa nga concern citizen han ira buhatan nga nahikit-an an mao nga biktima nga nakahigda ngan waray malay ha kagawayan ngan dayun naman ine ginkadto han mga otoridad kun diin nakumpirma an patay nga lawas hine.
Basar han inisyal nga imbestigasyun, waray naman nakita nga foul play o samad han parte han lawas han biktima ngan gintutu-uhan nga natural death an nagin kawsa han pagkamatay hine.
Mahibabaruan nga may-ada highblood ngan gin-aabat han iya lawas an mao nga biktima.
