Natad-an han mga otoridad nga waray na kinabuhi an usa nga lalaki harani ha kadagatan han Kalanggaman ngan Villaba, Letye dida han gab-i han mga nakalabay nga adlaw.
Ginkilala an patay nga lalaki kan alyas “Leon”, usa nga senior citizen, parupangisda ngan residente han Villaba, Leyte.
Subay han impormasyon, nga napansin han usa nga naagi nga parupangisda an usa nga baloto nga naglulutaw-lutaw ha kabutngaan han dagat.
Han iya ini ginkita, nakalasan nala ini nga mayda sakay an baloto nga patay nga lawas han lalaki kun diin, dayon ini nga tumawag hin bulig ha mga otoridad ngan ginpaligid an lawas pakadto ha pangpang kaupod an iba pa nga mga parupangisda.
Dida han imbestigasyon han mga otoridad, usa nga lalaki an nagkumpirma nga tatay niya an patay nga lalaki.
Nasabtan gihapon nga pira ka-oras ugsa an panhitabo, gindid-an han anak nga magpalawod an tatay hini pero nagmatig-a an tatay.
Samtang, basar naman han forensic examination, waray nakita nga bisan ano nga foul play ha nasabi nga panhitabo. Ginpaangbit gihapon han anak nga mayda history hin sakit ha kasing-kasing an tatay hini nga amo naman an ginkikita nga anggulo han mga otoridad.
